သွက်ဂွံလုပ်ဗဵုဂၠံၚ်စၞောန်ညးဗက်ဂဗုတ်ဂှ် လုပ်ဍဵုဒၞဲါဏံ ညိ။

• နကဵုမၞးဂှ် အခိၚ်ပြဟ်ၜိုတ်ပြဟ်မာန် ဒးလိၚ်ကော်တဴညးဗက်ဂဗုတ်တအ်မွဲမွဲတၠရောၚ်။
• ယဝ်ဒှ်အမှုဆေၚ်စပ်ကဵုရာဇဝတ်တအ်မ္ဂး စနူအခိၚ်ဒးဒုၚ်ရပ်တုဲဗက် အခေါၚ်ခၠေဝ်သှ် နကဵုညးဗက်ဂဗုတ်တအ်နွံရ။
• ကိစ္စကဵုရေၚ်တၠုၚ်ဆေၚ်ကဵုဥပဒေဂှ် ပြဟ်ဗီုပြဟ်ဂှ် သ္ဂောံဒုၚ်စသိုၚ်ဖဵုဂုဏ်ဂမၠိုၚ်နွံရ။ ဗွဲတၟေၚ် စပ်ကဵုအမှုရာဇဝတ်မ္ဂး ပွမကေတ်အရီုဗၚ်ဆေၚ်ကဵုဥပဒေ နအခိၚ်ပြဟ်ဟ်ဂှ် လ္တူတၚ်နၚ်ဂဗုတ် မစောဲစပ်လဝ်ကဵုဇကုဇကုတအ် ရုပ်သီကဵုကၠုၚ်မာန်ကီု၊ ဂွံတၚ်ဒုၚ်လျိုၚ်အဝံၚ်ပြဟ်ဟ်ကီုစပ္တံသာ်ဏံ က္လိဂွံဂုဏ်ဖဵုသၟးဟွံက သီုကဵုဒှ်ပရေၚ်စဵုဒၞါ နူကဵုဘဲအန္တရာဲဗၠာဲသၟိၚ်တအ်မပျဲပျာံဂမၠိုၚ်ကီုရောၚ်။

• ပ္ဍဲကဵုအမှုဂဗုတ်မွဲမွဲဂကူ ဂၠိုၚ်နူမၞိဟ်မွဲတၠ ဒးဒုၚ်စောဲကၠုၚ်နွံမ္ဂး ညးဒးဒုၚ်စောဲဂဗုတ်တအ် တၞဟ်ခြာဗီုညးကဵုညး လိၚ်ကော်ညးဗက်ဂဗုတ်ဇကုတုဲ ခၠေဝ်သှ်ထေက်ရောၚ်။
• အခိၚ်ကိုပ်ကၠာဏံ ပဋိပက္ခဂုဏ်ဖဵုပူဂဵုဟွံမွဲဏီဒှ်ကၠာလေဝ် လက္ကရဴမ္ဂး မံက်ဒှ်ကၠုၚ်မာန်ရောၚ်။ ဥပမာ- ညးဒးဒုၚ်စောဲမွဲတၠဂှ် ယဝ်ရဒုၚ်ဝန်တဴမ္ဂး ခိုဟ်သွက်မၞိဟ်ဂှ်ဟီုကၠာလေဝ် သှေ်သွက်မၞိဟ်ဒးဒုၚ်စောဲမွဲတၠဂှ် ယဝ်ရဆက်ဝေၚ်တဴဂဗုတ်မ္ဂး ခိုဟ်သွက်ညးမာန်ဏောၚ် ဒှ်ကၠုၚ်အကာဲအရာဂှ်မာန်ရောၚ်။

• နကဵုညးဗက်ဂဗုတ် သွက်လ္ပာ်မၞးမွဲမွဲတၠဂှ် ကိုပ်ကၠာအိုတ် သွက်ဂုဏ်ဖဵုမၞး ညံၚ်ဂွံဒှ်ကၠုၚ်မာန်ဂှ် ၜိုတ်အစောန်စရာဲညးနွံ ဒးရေၚ်တၠုၚ်ကဵုဏောၚ်တုဲ ပ္ဍဲအရာမကၠောန်သ္ပတဴသာ်ဂှ်ဝွံ သီုကဵုဒးမၚ်မွဲထိၚ်ဒဝ်တဴ ဒ္ဂေတ်ဝတ်သိက္ခာ ညးဗက်ဂဗုတ်သၟးဟွံက ဒးဒ္ဂေတ်ဗက်ဝတ်တာလျိုၚ်သၞောဝ်ဥပဒေမကဵုလဝ်တအ်ဂှ်ကီုရောၚ်။
• ညးဗက်ဂဗုတ်တအ်ဝွံ အလဵုဇကုကီုဒှ်၊ လ္တူညးမွဲသၟာၚ်ကီုဒှ် လီဠာန် ဟွံသေၚ် သုၚ်စောဲနဲကဲမွဲဗီုတုဲ ညံၚ်ဂွံအထေၚ်ဗၠေတ်ကဵု ရုၚ်သၞောဝ်ဓဝ်ဂှ် ကၠောန်သ္ပဟွံဂွံရောၚ်။
• နကဵုညးဗက်ဂဗုတ်တအ် ဒုၚ်တဲစလာဘ်ဗဇဴကီု ဒုၚ်တဲကၠောန်သ္ပပြဝဒ္ဂေတ်ပဋိပတ်လီုလီုကီု ကၠောန်သ္ပရေၚ်တၠုၚ်ဟွံဂွံရောၚ်။
• ဆေၚ်စပ်ကဵုကိစ္စညးဗက်ဂဗုတ်တအ် ကၠောန်သ္ပပြဝဟွံဒးဗီုတုဲ မိက်ဂွံဆက်တီနွံမ္ဂး လုပ်ဗဵုရံၚ် ဒၞဲါပုစ္ဆာလၟေၚ် ၁၈း တေၚ်အမှုဂဗုတ်ကဵုညးဗက်ဂဗုတ်ဇကုဇကုဂွံဟာ? တေံဂှ်ညိ။
• နကဵုညးဗက်ဂဗုတ်မွဲမွဲတၠဝွံ ဆေၚ်ကဵုတၚ်နၚ်အမှုဂဗုတ်မွဲမွဲကီု၊ ဆေၚ်ကဵုဥပဒေသၞောဝ်ဂမၠိုၚ်ကီု ဒးလ္ၚတ်တီလဝ်ဖၟိုတ်ရောၚ်။
• တန်တဴကဵုလ္တူအကာဲအရာတၚ်နၚ်အမှုဂဗုတ်မွဲမွဲတုဲ နကဵုညးဗက်ဂဗုတ်တအ် ညံၚ်ဂွံသုၚ်စောဲတဴသၞောဝ်ဥပဒေနတဲမာန်ဂှ် ပၟိက်ဇၞော်တုဲ ဆေၚ်စပ်ကဵုအကာဲအရာပရေၚ်ဂဗုတ်ဂှ်တုဲ ခိုဟ်အိုတ် ညံၚ်ဂွံဒှ်ကၠုၚ်မာန် တာလျိုၚ်ဒးကဵုကသပ်ကဵုညးအပ်ပြာပ်ဂဗုတ်ကုဇကုတအ်ဂှ်နွံရောၚ်။
• ကာလဒးဘိုၚ်ရေၚ်တၠုၚ်ဗက်ဂဗုတ်ကောန်ၚာ်သၟတ်တအ်မ္ဂး နကဵုညးဗက်ဂဗုတ်တအ် ဒးသုၚ်စောဲဟီုဂးဂလာန်ဝေါဟာကောန်ၚာ်သၟတ်ဂှ်ကၠိုဟ်ခၠၚ်မာန်၊ ကေတ်အခိၚ်တုဲ ဒးသောၚ်က္လးကဵုကောန်ၚာ်ဂှ်ဆေၚ်စပ်ကဵုသၞောဝ်ဥပဒေဂမၠိုၚ် ထေက်ရောၚ်။
• ကာလဒးဆိုၚ်မုက်ဝေၚ်အမှုပ္ဍဲရုၚ်သၞောဝ်ဓဝ်နွံကၠုၚ်မ္ဂး ဆေၚ်ကဵုကိစ္စဒးပ္တိုန်ထ္ၜးသက်သဳ ကေုာံ စၟဳစၟတ်ကီု၊ ဆေၚ်ကဵုဒးပၠောပ်သက်သဳသွက်ရဲဝေၚ်အမှုကီု၊ ပွမပ္တိတ်ဂလာန်သၟာန်က္လေၚ်စၟဳစၟတ် လ္တူတၚ်နၚ်သက်သဳညးဝေၚ်အမှုမွဲလ္ပာ်တအ်ပၠောပ်နၚ်ဂှ်ကီု၊ နွံပၟိက်ကၠုၚ်မ္ဂး ပွမဒစဵုဒစးကီုတအ်ဂှ် နူကဵုညးဗက်ဂဗုတ်တအ် ကၠောန်သ္ပရေၚ်တၠုၚ်ကဵုရောၚ်။
• ဇၟာပ်မပၚ်မှိၚ်စၟဳစၟတ်အမှုဂှ် ဒးမၞုံကဵုညးဗက်ဂဗုတ်တုဲ ညံၚ်ဂွံဂွံလိက်တၞးရုၚ်သၞောဝ်ဓဝ် မအာတ်မိက်ကၠုၚ်တအ်ကီု ညံၚ်ညးဝေၚ်အမှု ဂွံဂွံတၞးဆာဲတအ်ကီုဂှ် ညးဗက်ဂဗုတ်တအ် ရေၚ်တၠုၚ်ကဵုရောၚ်။
• နကဵုညးဗက်ဂဗုတ်မွဲမွဲတအ်ဝွံ ပ္ဍဲအရာကိစ္စသ္ဂောံစၟဳစၟတ်တၚ်နၚ်သာဓကတအ်ကီု၊ သ္ဂောံအာစိုပ်လ္ၚတ်တဴဒၞဲါမဒှ်လဝ်ပရေၚ်ပရောအမှုတအ်ဂှ်ကီု၊ သ္ဂောံအာဆဵုဂဗကဵုညးမဒှ်သက်သဳနမတ်တအ်ကီု စပ္တံတအ်ဂှ် ဒးရေၚ်တၠုၚ်ဂၠိုက်ဂၠာဲကဵုရောၚ် တာလျိုၚ်နွံရ။
• မွဲဒမြိပ်အခိၚ်မဝေၚ်ဒၟံၚ်အမှုဂှ် ဆက်စပ်ကဵုအမှုဂှ်တုဲ ဒးက္လေၚ်ပရိုၚ်လဴထ္ၜးမံၚ်ကဵုရဲဝေၚ်အမှုကီု ပရေၚ်တဴတက်အမှု အကာဲအရာလက္ကရဴအိုတ်ဗီုလဵုနွံတအ်ဂှ် နကဵုညးဗက်ဂဗုတ်တအ် ဒးဟီုထ္ၜးရောၚ် တာလျိုၚ်နွံရ။
• ဆေၚ်စပ်ကဵုအမှုဂဗုတ် မရပ်စပ်ဒၟံၚ်ဂှ်တုဲ တၚ်နၚ်လ္ပာ်ရဲဝေၚ်အမှုဂမၠိုၚ်၊ ပရေၚ်ဟီုဂးတက်ကျာဆက်ဆောံကဵုရဲဝေၚ်အမှုဂမၠိုၚ် ညံၚ်ဟွံဂွံမံက်တိတ်မ္ၚးဂှ် နကဵုညးဗက်ဂဗုတ်တအ် ဒးထိၚ်ဒဝ်မၚ်မွဲရောၚ် တာလျိုၚ်နွံရ။ လုပ်ဗဵုကျောဝ်ရံၚ် ဒၞဲါပုစ္ဆာလၟေၚ် ၁၁း တာလျိုၚ်ညးဗက်ဂဗုတ်တအ် ဒးမၚ်မွဲထိၚ်ဒဝ် ညံၚ်တၚ်နၚ်ပရိုၚ်ဟွံဂွံမံက်ဟီုဂှ် မုရော? တေံဂှ်ညိ။

• တၚ်နၚ်ဆေၚ်စပ်ကဵုညးဝေၚ်အမှုပ္ဍဲဇကုညံၚ်ဟွံဂွံမံက်တိတ်လ္ပာ်မ္ၚးမာန် ဒးသီဂိုၚ်တဴလိက်တၞး၊ လိက်စၟတ်သမ္တီဆက်စပ်ကဵုအမှုတအ် ဗွဲမဂီုကၠီုတုဲ ပရေၚ်ဆက်စၠောံဟီုဂး အကြာညးဗက်ဂဗုတ်ကဵု ညးဝေၚ်အမှုတအ်ဂှ် ဟီုပ္တိတ်ဟွံဂွံ စပ္တံသာ်ဏံ ညးဗက်ဂဗုတ်တအ် ဒးမၚ်မွဲထိၚ်ဒဝ်လဝ်ရောၚ်။
• ပ္ဍဲအခိၚ်ကာလမဘိုၚ်ရေၚ်တၠုၚ်ဗက်ကဵုဒၟံၚ်အမှုညးမွဲမွဲဝွံ ညံၚ်ညးဗက်ဂဗုတ်ဂှ် သ္ဂောံဟီုပ္တိတ်တၚ်နၚ်မပၞုက်ဓလုက်လဝ်ဂမၠိုၚ်တုဲ အခေါၚ်ကၠောန်သ္ပကရေပ်ဓရတ်ညးဗက်ဂဗုတ်ဂှ်ဟွံမွဲရောၚ်။
• ပ္ဍဲကဵုဒၞဲါဏံဝွံ တၚ်နၚ်လ္ၚဵုလ္ၚဵုတအ်ဟေၚ် ကၠောန်သ္ပမာန်ရ။ ယၚ်တအ်ဂှ်ဝွံ -
• နကဵုမၞး ဒစဵုဒစးသၞောဝ်ဥပဒေတုဲ ဒဒှ်ရကၠောန်သ္ပလုတ်လောန်ဒုဟ်ဏောၚ် ဟီုဂးလဝ်တအ်ဂှ် ဟွံကဵုလဝ်ပရေၚ်စဵုဒၞါရ။
• လိၚ်ကော်ညးဗက်ဂဗုတ်တုဲဒှ်မှ လုတ်လောန်ကၠေံဒုဟ်မွဲမွဲမ္ဂး ဆေၚ်စပ်ကဵုဒုဟ်လုတ်လောန်ဂှ်တုဲ သွက်ဂွံတေၚ်လဴစကဵုညးအဝဵုအာဏာတအ်ဂှ် တာလျိုၚ်နွံပ္ဍဲညးဗက်ဂဗုတ်ဂမၠိုၚ်ရောၚ်။
• ပရေၚ်ဒးပၞုက်ဓလုက်တၚ်နၚ်တအ်ဂှ် ဟွံမွဲပၟိက်ရ နူကဵုမၞး ယဝ်ရချူကဵုတၞးလိက်လုပ်ဗဗွဲသၞောဝ်မ္ဂးလေဝ် ပဲါစွံလဝ်မွဲကဏ္ဍကီုရ။
• နကဵုမၞး ကာလဒးဟီုဂးစပ်ကဵုကိစ္စအမှုဂဗုတ်မ္ဂး သၟာၚ်နူညးဗက်ဂဗုတ်ဇကုတုဲ ညးမွဲသၟာၚ်လေဝ် အကာဲအရာမိၚ်ကေတ်မာန်နွံမံၚ်ဏောၚ်ဂှ် စွံဂရုဗွဲတၟေၚ်ညိ။
• အခေါၚ်အရာဟီုဂးဆက်စၠောံဗွဲမဂီုကၠီုပၞုက်ဓလုက်ဝွံ ဒဵုကဵုအကာဲအရာပရေၚ်တက်ကျာဟီုဂး အကြာညးဗက်ဂဗုတ်ကဵု ညးဝေၚ်အမှုတအ် ပ္ဍဲထံၚ်စာတ်ဂှ် ပါလုပ်မံၚ်ရောၚ်။
• သာ်ဂှ်ကီု ပရေၚ်ဟီုဂးတက်ကျာ နကဵုညးကၠာဲဘာသာကီုဒှ်၊ ဂတမုက်သၞာဲဒဴညးဗက်ဂဗုတ်ဇကု ခါန်ကၞက်လဝ်သွက်ဂွံဘိုၚ်ရီုဗၚ်စပ်ကဵုအမှုဇကုကီုဒှ်တအ်ဂှ်လေဝ် ဒှ်တၚ်နၚ်ပရိုၚ် ဒးစွံလဝ်ဗွဲမပၞုက်ဓလုက်တုဲ တၚ်နၚ်တအ်ဂှ် ပ္ဍဲကဵုသၞောဝ်ဥပဒေတေံ ကဵုလဝ်ပရေၚ်စဵုဒၞါရ။
• ဒှ်မာန်မ္ဂး ကိုပ်ကၠာနူဟွံဂွံဆက်စၠောံဟီုဂးကဵုညးဗက်ဂဗုတ်မွဲသာ်ၜါရာဏီဂှ် တၚ်နၚ်မဟီုဂးလၟုဟ်တအ်ဝွံ ဒှ်တၚ်နၚ်ဒးမၚ်မွဲထိၚ်ဒဝ်ရောၚ် ဟီုဂးသောၚ်က္လးကဵုညးဗက်ဂဗုတ်မၞးဂှ်ကၠာထေက်ရောၚ်။

• ညးဗက်ဂဗုတ်မွဲမွဲတၠဝွံ ကာလဒးပါလုပ်ရေၚ်တၠုၚ်ဗက်အမှုဂဗုတ် မက္တဵုဒှ်ဒၟံၚ်အကြာမၞိဟ်ၜါတၠတအ်ဂှ်မ္ဂး ပဋိပက္ခဂုဏ်ဖဵု မံက်ဒှ်ကၠုၚ်တုဲ ပွမကၠောန်သ္ပရေၚ်တၠုၚ်တဴသာ်ဂှ်တအ်ဂှ် တာဒၞါလဝ်ရောၚ်။
• နကဵုညးဗက်ဂဗုတ်မွဲမွဲဝွံ အတိုၚ်တၚ်စၞောန်နူကဵုညးလိၚ်ကော်လဝ်တအ်ဂှ်ဟေၚ် ဒးဒုၚ်ကေတ်တဲရောၚ်။
• ပ္ဍဲကဵုသၞောဝ်ဥပဒေနွံမံၚ်လၟုဟ်တအ်ဂှ် တာဒၞါလဝ်ဟွံမွဲကီုလေဝ် အပ္ဍဲကဵုပရေၚ်အမှုဂဗုတ် ညးဒးဒုၚ်စောဲပါလုပ်လၟိဟ်မၞိဟ်ဂၠိုၚ်ၚ်တအ်မ္ဂး သွက်ညးမွဲတၠဓဝ်ဟေၚ် ညးဗက်ဂဗုတ်တအ် ဒးဗက်ကဵုအမှုထေက်ရောၚ်။
• အခိၚ်ကိုပ်ကၠာဏံ ပဋိပက္ခဂုဏ်ဖဵုပူဂဵုဟွံမွဲဏီဒှ်ကၠာလေဝ် လက္ကရဴမ္ဂး မံက်ဒှ်ကၠုၚ်မာန်ရောၚ်။ ဥပမာ- ညးဒးဒုၚ်စောဲမွဲတၠဂှ် ယဝ်ရဒုၚ်ဝန်တဴမ္ဂး ခိုဟ်သွက်မၞိဟ်ဂှ်ဟီုကၠာလေဝ် သှေ်သွက်မၞိဟ်ဒးဒုၚ်စောဲမွဲတၠဂှ် ယဝ်ရဆက်ဝေၚ်တဴဂဗုတ်မ္ဂး ခိုဟ်သွက်ညးမာန်ဏောၚ် ဒှ်ကၠုၚ်အကာဲအရာဂှ်မာန်ရောၚ်။

• နူကဵုညးဗက်ဂဗုတ်တအ် ယဝ်ရဒုၚ်တဲတုပ်စိုတ်ဗက်အမှုမၞးဏောၚ်ဟီုမ္ဂး မၞးဒးထ္ပက်ကဵုစၟတ်တဲရောၚ်။ လိက်ထ္ပက်စၟတ်တဲဂှ်ဝွံ မဒှ်လိက်ချူဓမံက်လဝ်တၚ်ပဋိဉာဏ်အကြာညးဗက်ဂဗုတ်ကဵု မၞး (ညးဝေၚ်အမှု) ၜါလ္ပာ်ရောၚ်။ လိက်စၠောံတဲညးစၞး မၞးထ္ပက်လဝ်စၟတ်တဲဂှ် ဆက်ပ္တိုန်ဏာကဵုရုၚ်သၞောဝ်ဓဝ်မဆေၚ်စပ်တအ်ရောၚ်။
• အတိုၚ်ဗွဲသၟဝ်တေံလေဝ် နူကဵုညးဗက်ဂဗုတ်တအ် ဆက်ရေၚ်တၠုၚ်အာမာန်ပၠန်ရောၚ်။
• နူကဵုရဲဝေၚ်အမှုဆက်စၠောံကၠုၚ်မ္ဂး ပွမက္လေၚ်ဟီုဂးကဵုပရိုၚ်ကီု၊ ဆက်စပ်ကဵုပရေၚ်တဴတက်အမှုတုဲ အကာဲအရာလက္ကရဴအိုတ် ဗီုလဵုနွံကီုဂှ် ဟီုထ္ၜးစကီု။
• ပရေၚ်ပရဟ်ဒုၚ်ပလေဝ်ပလေတ် သွက်အခိၚ်ချိၚ်ရုၚ်အမှုဂတဏံကီု၊ အခိၚ်ချိၚ်ရုၚ်အမှုဂှ်တုဲ အကာဲအရာဗီုလဵုဆက်ဒှ်ကၠုၚ်မာန် သောၚ်က္လးဟီုထ္ၜးကီု။
• ပွမကေတ်လိက်သ္ကုတ်၊ တၚ်နၚ်ဆေၚ်စပ်ကဵုအမှုမၞးကီု။
• ပွမသီဂိုၚ်ဒေပ် တၚ်နၚ်ဆေၚ်စပ်ကဵုအမိၚ်ရုၚ်သၞောဝ်ဓဝ်ကီု၊ လိက်တၞးစၠောံတဲညးစၞးဗက်ဂဗုတ်ကီု သီုကဵုတၚ်နၚ်မဆေၚ်စပ်ကဵုအမှုသီုဖၟိုတ်တအ်ဂှ် ပါလုပ်ရ။
• ယဝ်ရမၞး လုပ်နွံဒၟံၚ်ပ္ဍဲကဵုအချုက်ဗၠာဲသၟိၚ်မ္ဂး ညံၚ်မၞးဂွံဗၠးတိတ်ပြဟ်ဟ်မာန်ဂှ် နူကဵုညးဗက်ဂဗုတ်မၞးဂှ် ဟီုဂးပ္တိုန်ထ္ၜးကဵုရောၚ်။
• တာလျိုၚ်ညးဗက်ဂဗုတ်မွဲမွဲဝွံ ပ္ဍဲအရာမၞးမရုဲစှ်ဖျေံသ္ဂုတ်သွာတ်ဂှ် ညံၚ်ဂွံနွံကဵုတၚ်နၚ်ဍိုက်က်ပေၚ်ၚ်ဗွဲမဍာံပြဂှ် ကဵုတဴအရီုဗၚ်သွက်မၞးရောၚ်။ ညးဗက်ဂဗုတ်မွဲမွဲဝွံ ဒးပသ္ဇိုၚ်ကဵုညးအပ်ပြာပ်လဝ်အမှုကဵုဇကုတုဲ ဒးကၠောန်အာကမၠောန်ဂှ်ရ တၚ်စၞောန်ပညုၚ်တအ်ဂှ်လေဝ် ဒးကေတ်နူကဵုမၞးမွဲဟေၚ်ရ။
• ၜိုန်ဂှ်လေဝ် လ္တူတၚ်စၞောန်ပညုၚ်မၞးမကဵုနၚ်လဝ်ဂှ် ဒၞဲါလ္ၚဵု ကၠောန်ဂွံမာန်၊ ဟွံမာန်ဂှ် ဒးက္လေၚ်သောၚ်က္လးရောၚ်။ ဥပမာ - တၚ်စၞောန်ဂှ်ဝွံ ဒစဵုဒစးမံၚ်သၞောဝ်ဥပဒေရောၚ်။ တၚ်စၞောန်တေံဂှ်ဝွံ အတိုၚ်သၞောဝ် ကၠောန်ဗက်ဟွံဂွံရောၚ် စပ္တံသာ်ဏံ ဒးသောၚ်က္လးရောၚ်။

• တၚ်နၚ်၊ သက်သဳ၊ တၞးလိက်ဆေၚ်စပ်ကဵုအမှုဂဗုတ်ဂမၠိုၚ်တုဲ သွက်ဂွံအပ်ပြာပ်ဒုၚ်ကဵုညးဗက်ဂဗုတ်ဇကုမာန်ဂှ် ပ္ကောံပ္ကေဝ်လဝ်ညိ။
• ကာလဆဵုဂဗကဵုညးဗက်ဂဗုတ်မ္ဂး တၚ်နၚ်မၞးမိက်ဂွံတီ၊ မိက်ဂွံကဵုသောၚ်က္လးတအ်ဂှ် ပလေဝ်ပလေတ်ပ္ကောံပ္ကေဝ်လဝ်ပုစ္ဆာ၊ တၚ်လဵုဒှ်ဓဝိၚ်စိုတ်တအ်ဂှ် ပလေဝ်လဝ်ဒတုဲထေက်ရောၚ်။
• ဆေၚ်စပ်ကဵုအကာဲအရာအမှုဂဗုတ်တုဲ ဟိုတ်ဖဵုနွံနွံ ညံၚ်ဂွံဟီုဂးပ္တိုန်ထ္ၜး သောၚ်ၚ်ကၠးကၠး ဗွဲမယျဵုလ္ဂူဂှ် ပလေဝ်ပလေတ်လဝ်ထေက်ရောၚ်။

• အခေါၚ်အရာ၊ ဝတ်တာလျိုၚ်မၞးဂမၠိုၚ်ကီု အခေါၚ်မၞးရေၚ်တၠုၚ်ဂွံစပ်ကဵုသၞောဝ်တအ်ဂှ်လေဝ် နကဵုမၞးဒးသၟာန်တဴညးဗက်ဂဗုတ်ထေက်ရ။
• ပ္ဍဲအရာမၞးမဖျေံတဴတၚ်သ္ဂုတ်သွာတ်ဂှ် ညံၚ်ဂွံနွံကဵုတၚ်နၚ်ဍိုက်က်ပေၚ်ၚ်မာန် အရာမၞးဒးကၠောန်တဴနဇိုၚ်နတဲဂမၠိုၚ်မ္ဂး တၚ်ခိုဟ်၊ တၚ်ပရေံသာ်လဵုနွံကၠုၚ်မာန် မၞးဒးကေတ်ကသပ်လညာတ် နူကဵုညးဗက်ဂဗုတ်မၞးထေက်ရောၚ်။
• စပ်ကဵုအမှုမၞးတုဲ က္တဵုဒှ်ပဋိပက္ခဂုဏ်ဖဵု မာန်၊ ဟွံမာန် ဒးသၟာန်တဴညးဗက်ဂဗုတ်မၞးထေက်ရောၚ်။ ပ္ဍဲအရာမသၟာန်ဂှ်ဝွံ ဆေၚ်စပ်ကဵုအမှုမၞးတုဲ ပ္ဍဲကဵုမၞိဟ်မပါကၠုၚ်နဒဒှ်သက်သဳတအ်ဂှ် နကဵုညးဗက်ဂဗုတ်မၞး ဘိုၚ်ရေၚ်တၠုၚ်ဒၟံၚ်ကဵုအမှုနွံဟာ ဟွံသေၚ်မ္ဂး ကေၚ်ဗက်လဝ်အမှုသွက်မၞိဟ်ဂှ်နွံဟာ ဒးသၟာန်ထေက်ရောၚ်။

• စပ်ကဵုအမှုဂဗုတ်မၞးတုဲ နူကဵုညးဗက်ဂဗုတ်မွဲမွဲတၠ ရေၚ်တၠုၚ်ဗက်ကဵုအမှုရောၚ် ဒုၚ်တဲတုပ်စိုတ်မ္ဂး နကဵုမၞးဂှ် ဒးထ္ပက်စၟတ်တဲ ပ္ဍဲတၞးလိက်စၠောံတဲအပ်ပြာပ်ညးစၞးသွက်ဂွံဗက်ဂဗုတ်ဂှ်ရောၚ်။ လိက်ဂှ်ဝွံ မဒှ်လိက်တၚ်တုပ်စိုတ်ပဋိဉာဏ်အကြာမၞး (ညးဝေၚ်အမှု) ကဵုညးဗက်ဂဗုတ်တအ်မွဲဂကူရောၚ်။
• တၞးလိက်မၞးထ္ပက်လဝ်စၟတ်တဲဂှ် နူကဵုညးဗက်ဂဗုတ်တအ် ဂွံဆက်ရေၚ်တၠုၚ်ဗက်ကဵုမၞးမာန် ညးတအ် ဒးဆက်ယိုက်ပ္တိုန်ဏာကဵုရုၚ်သၞောဝ်ဓဝ်မဆေၚ်စပ်တအ်ရောၚ်။
• တၞးလိက်စၠောံတဲညးစၞးဗက်ဂဗုတ် မပ္တိုန်ဏာလဝ်ကဵုရုၚ်သၞောဝ်ဓဝ်ဂှ်ဝွံ ဒဵုကဵုအမှုအာစိုပ်ဒတုဲကီု၊ ညးဗက်ဂဗုတ် ဟွံသေၚ် ညးဝေၚ်အမှုမွဲမွဲ ဒဵုကဵုစုတိအာကီုဂှ် လမျီုလုပ်မံၚ်ရောၚ်။
• နူကဵုညးဝေၚ်အမှုကီုဒှ် ညးဗက်ဂဗုတ်ကီုဒှ် ညံၚ်ဂွံကဵုအခေါၚ်ရုပ်သီကၠေံလိက်တၞးစၠောံတဲညးစၞးဗက်ဂဗုတ်ဂှ်မာန် အာတ်မိက်ပ္တိုန်ကၠုၚ်မ္ဂး နူကဵုရုၚ်သၞောဝ်ဓဝ် သၠးကဵုအခေါၚ်ရုပ်သီမာန်ရောၚ်။

• ညးဗက်ဂဗုတ်တအ်ဝွံ သွက်ဂွံဒးဆက်စၠောံကဵုမံၚ်ပရိုၚ် ကုညးဝေၚ်အမှု ဗွဲမဂတာပ်အခိၚ်လၟိုန်ဂှ် တာလျိုၚ်နွံရောၚ်။
• ဆက်စပ်ကဵုအကာဲအရာပရေၚ်တဴတက်အမှု လက္ကရဴအိုတ်ဗီုလဵုနွံတဴဂှ်လေဝ် နူကဵုညးဂဗုတ် သွက်ဂွံဒးလဴထ္ၜးကဵု ညးဝေၚ်အမှုလၟို်န်ဂှ် တာလျိုၚ်နွံရောၚ်။
• နကဵုမၞး ယဝ်ရအဆက်ပိုတ်ဒၟံၚ်ကဵုညးဗက်ဂဗုတ်မၞးလအ်ကၠုၚ်မ္ဂး ဟွံသေၚ် အခိၚ်အမှုလက္ကရဴအိုတ် ဟွံသေၚ် ကြပ်ကၠုၚ်ကဵုအခိၚ်ချိၚ်ရုၚ်ပၚ်မှိၚ်အမှုမ္ဂး ဒးကဵုပရိုၚ်ကဵု ညးဗက်ဂဗုတ်မၞး ဗွဲမပြဟ်ထေက်ရောၚ်။ တုဲပၠန် လၟေၚ်ပရောဒဒှ်သောဲသောဲဗြောဲဗြောဲဖၟိုတ်ဂှ် ချူသမ္တီလဝ်ညိ။ နွံပၟိက်ကၠုၚ်မ္ဂး သွက်ဂွံတေၚ်အမှုမာန် ချပ်ဗ္စာလဝ်ထေက်ရောၚ်။

• စပ်ကဵုစရာဲဍာ်ဒ္ကေဝ်ရေၚ်တၠုၚ်ကၠောန်ကမၠောန်ကီု၊ အကာဲအရာပြဝတၞဟ်ဟ်သာ်ကီု ယဝ်ရဒှ်ကၠုၚ်ဓဝိၚ်စိုတ်လ္တူညးဗက်ဂဗုတ်မၞးနွံမ္ဂး အခေါၚ်တးပဲါကၠေံ ညးဗက်ဂဗုတ်ဂှ်နွံရောၚ်။
• အကြာမၞးကဵုညးဗက်ဂဗုတ်မၞး လညာတ်ဟွံတုပ်ကၠုၚ်နွံမ္ဂး ဆေၚ်စပ်ကဵုအကာဲအရာဂှ်တုဲ မၞးကေတ်တၚ်သောၚ်က္လးနူကဵုညးဗက်ဂဗုတ်ဂှ်ညိ။ မၞးဂှ် ဟိုတ်နူဒှ်မံၚ်ညးဝေၚ်အမှုဂဗုတ်ဂှ်ရ မၞးဟေၚ် ဒးဖျေံသ္ဂုတ်သွာတ်ကၞောတ်အထောတ်ရောၚ်။
• ၜိုန်ဂှ်လေဝ် ပရေၚ်ဒးဒစဵုဒစးကဵုသၞောဝ်ဥပဒေကီု၊ ဟွံသေၚ် ပရေၚ်ဒ္ဂေတ်ပဋိပတ်လီုလာ်ကီုတအ်ဂှ် နကဵုညးဗက်ဂဗုတ်တအ် ရေၚ်တၠုၚ်ကဵုမာန်ဟွံသေၚ်ရောၚ်။
• ညးဗက်ဂဗုတ်မွဲမွဲ ဒ္ဂေတ်ဝတ်လီုလာ်ယောၚ်ယာကၠုၚ်နွံမ္ဂး တေၚ်အမှုဂွံရောၚ်။ ပ္ဍဲကဵုဒ္ဂေတ်ဝတ်သိက္ခာလီုလာ်ဏံဝွံ ဖံက်ပၠန်တဴနူသဘာဝတုဲ ကၠောန်တဴပြဝနာနာသာ်မာန်ကီု၊ ချူဗဒှ်လိက်ကၠဟ်လိၚ်တေၚ်တအ်မာန်ကီု စပ္တံသာ်ဏံ နကဵုညးဗက်ဂဗုတ်တအ် ကၠောန်သ္ပဟွံဂွံဟီုဂှ် ပါလုပ်မံၚ်ရောၚ်။
• ညးဗက်ဂဗုတ်ဂှ် ယဝ်ရဒှ်မံၚ်ကၠတ်ထဝ်သၞောဝ်မ္ဂး တေၚ်ပ္တိုန်လိက်ကဵု ဇရေၚ်သ္ကိုပ်ကၠတ်ထဝ်သၞောဝ်ကၟိန်ဍုၚ်တေံမာန်ရောၚ်။ သွက်ညးဗက်ဂဗုတ်အဆံၚ်သၠုၚ်ဂမၠိုၚ်ဂှ် တေၚ်ပ္တိုန်ကဵုရုၚ်သၞောဝ်ဓဝ်အဆံၚ်သၟဝ်ဝ်တအ်ဂွံမာန်ရောၚ်။
• ညးဗက်ဂဗုတ်ဂကူလဵုမွဲဟွံဟီု တၚ်သ္ဂုတ်သွာတ်ကၞောတ်အထောတ်ဂှ်နွံဒၟံၚ်ပ္ဍဲသ္ကိုပ်ကၠတ်ထဝ်သၞောဝ်ကၟိန်ဍုၚ်ရတုဲ ဒဵုကဵုအဆံၚ်ရုပ်သီကၠေံအခေါၚ်ကၠောန်ကမၠောန်ညးဗက်ဂဗုတ်ဂှ် ကေတ်အရေဝ်မာန်ရောၚ်။